2010-06-16 Wed (Day 11) Firenze 佛羅倫斯
今日最後一日响佛羅倫斯, 將行理安頓後, 離開. 天陰陰重落大雨, 今曰都係無計畫行程, 因為今晚會搭火車落拿波里. 又行去中央市場間Nerbone食牛肉包Panino con bollito(3歐), 真係好好味! 唔似香港嘅沙嗲牛肉包, 似清湯蚊牛腩, 然後切成一塊塊放入包內, 再加芫茜, 同辣醬,肉汁香濃完全唔鞋好有牛肉味. 總之非常好味啦! 記得第一日約下午一時半來到但牛肉包已經賣哂, 所以買咗牛肚包, 間舖好似做到午市, 應該下午兩三時收舖, 所以唔好咁晏去.
食完晏之後, 唔知去邊好, 於是打開本旅遊書, 睇吓去邊, 肥G就提議去波波利庭園Giardino di Boboli, 去到門口售票處, 發現票價10歐, 並不是書上所寫嘅4歐, 因為佢將幾個地方串聯一起要你買套票, 唔俾你單買一個地方, 完全係打劫. 本來我覺得好唔抵. 但肥G話我無提議, 咁唯有入去啦! 張票除波波利庭園, 還包括Bardini庭園, 同埋一啲Museum.
波波利庭園入面都係有個普普通通嘅大花園, 一啲雕像, 裏面比較靚嘅係噴泉.
總括來說, 波波利庭園唔去都無乜損失, 而Bardini庭園就完全可以唔駛去. 由於行到好晏, 要競步返B&B攞行理趕火車, 一早响網上買咗佛羅倫斯去羅馬嘅IC火車(1750-2040, Meno30票20歐), 之後再轉ICN火車去拿波里(2120-2323, Meno30票14歐). 由於好夜先到拿波里, 所以Book咗火車站一行出來就見到嘅Hotel Ideal Naples(40歐), 又細又污糟, 如果唔係咁夜到, 同埋只係住一晚, 都唔會book呢間啦. 大家千祈唔好住呢間呀!
Hotel Ideal Naples; Addr Piazza Garibaldi 99, 80142 Naples; Tel (+39) 081-202223; info@albergoideal.it; http://www.albergoideal.it/en/index.htm ; Double room with private bath
留言列表
