2010-06-15 Tue (Day 10) Firenze 佛羅倫斯
今朝經過不愉快事件及搬完hostel後, 離開hostel已經中午, 幸好今曰響我行程表當中並無特別編配行程, 只是市內觀光. 唯一行程就係參觀Duomo S. Maria del Fiore聖母百花大教堂(免費), 最重要係上Dome大圓頂(8歐), 洗禮堂(5歐). 於是先去中央市場食非常好食嘅牛肉包填飽個肚先, 正所謂三軍未動糧草先行嘛! 之後就係大圓頂 - 我來也!
奉勸到佛羅倫斯嘅朋友, 用幾萬蚊來意大利玩, 就千祈唔好慳呢幾歐, 你唔上大圓頂一定係你嘅損失. 無論係大圓頂內部嘅最後的審判壁畫, 定抑或登上圓頂頂部看到嘅遼闊景觀, 你就會覺得負出嘅勞力(行咗幾佰級樓梯身水身汗喘哂氣), 負出嘅金錢, 一切都係值得嘅! 絕對係物超所值! 雖然影相技術差, 相機削, 都阻唔到佢嘅宏偉同美麗.
最後的晚餐, 當然又係La Spada啦!
題外話, 如果大家打算買名牌, 如果唔係太大件或太重, 奉勸大家響呢度買唔好等到去羅馬先買, 反正價錢一樣, 好似肥G(我老伴)嘅三位同事, 托佢買三對仙奴牌孖C朱義盛(假石)耳環, 話香港賣成二仟個大洋, 我同肥G咪去咗共和國廣場附近間仙奴牌睇, 價錢105歐一對, 我個人覺得似花園街貨式囉! 響B&B email比佢地, 佢地知道個價錢後非常雀躍, 我諗住呢種咁typical嘅款式唔會無所以打算到尾站羅馬先至買, 費事攞又驚會唔見. 點知去到羅馬名店街, 發覺已經比祖國非常富有嘅同胞攻陷咗啦! 你會發現有講普通話嘅售貨員. 講番正題, 去到仙奴牌竟然無孖C朱義盛穿耳耳環, 得夾耳款非常老土, 而另有一款比較金屬啲嘅孖C, 但貴好多要145歐, 店員話係新款, 我都覺得幾靚, 肥G同同事幾次email後, 兩個話一定要, 另一個就可買可唔買, 之後再去仙奴牌, 店員話同款一本Passport只可買一對, 我地有兩本Passport可買兩對, 想買一對另一款嘅, 但啲款好少得十多個又老土, 真係買唔落手, 佛羅倫斯間仙奴牌有成三四十個款o架! 最後唯有淨係買兩對, 店員話分單唔夠錢做退稅, 無法啦都要買. 不過肥G同事收到之後話好鐘意香港未見過呢個款, 重要即刻帶添!
留言列表
